Bizkaia da Euskal Autonomia Erkidegoko lurralde historikorik zahartuena: biztanleen % 23,4 65 urtetik gorakoak dira. Gizartearen zahartze horrek aukera berriak irekitzen ditu ekintzailetzarako eta negozio-ildo berriak garatzeko bai eremu soziosanitarioan bai adinekoen behar espezifikoei erantzutean. “Ekin Silver Economy” programak arlo horretako enpresa-proiektu berriak bultzatu gura ditu, lanpostuak sortzen laguntzeko eta, aldi berean, balio sozial erantsia izateko, adinekoengan duten eraginagatik.
Egitaraua
Otsailaren 16an, eguenean, Getxo Elkartegian, ekimen hau aurkezteko lehen saioa egingo dute. Horretan, SSI Taldeko lantaldeak ekintzaileakaz eta enpresakaz partekatuko ditu erakunde horrek 35 urte baino gehiagoko ibilbide kooperatiboan identifikatutako aukerak, eta programaren funtzionamenduaren berri emango du. Saio hori hilaren 24an errepikatuko dute Bilbon.
Interesa duten ekintzaileek eta enpresek SSI Taldeko ekintzailetza sozial eta kooperatiboan aditua den profesional-talde bategaz batera egingo dute lan gutxieneko proiektu bideragarriak sortzen, geroago merkatura eramateko. Era berean, aholkularitza jasoko dute kooperatiben arloan, ekintzailetza sustatzeko enpresa-gako batean, EAEn oso errotuta dagoen arren, ekintzailetza-prozesuetan dauden pertsonek ez baitute beti ezagutzen: gizarte-ekonomia.
“Ekin Silver Economy” posible da Eusko Jaurlaritzak finantzatutako ZainLab II berrikuntza-programari esker. Zainketen arloan rol eta figura profesional berriak inplementatzera eta hedatzera bideratuta dago, eta Eusko Jaurlaritzako Lan eta Enplegu Sailak bultzatutako ekimena da.