Institutuak neurria txertatu zuenetik "asko izan dira berandutze zein parteak jaso izan dituzten ikasleak", azaldu du Uribe Kostako Ikasle Abertzaleak taldeak. Horregatik, horren hainbat atal salatu ditu. Neurri berria euren "sarrera guztiak erregistratuak izateko saiakera" bezala deskribatu du, eta ez dio zentzu praktikorik ikusten. Izan ere, argitu duenez "ez dakar ikasleak lehenago heltzea, alderantziz, izena emateko ilaran minutu gehiago galtzen dituzte". Halaber, neurri horrek betetzen duen "diziplinazko funtzioa" salatu du: "Izaera guztiz irrazional eta autoritarioa du, ikasleek buru-makur eta kritikarako aukerarik gabe bete behar dutena, eta bere oinarrian, ikasleak arbitrarioki zigortzeko helburua baino ez duena".
Bestalde, taldeak azaldu du neurri horren agerpena ez dela "ausazkoa" izan. Aurretiaz ikasturte osoan zehar salatu du ikastetxeak diziplinamendurako zentro bilakatzen ari zirela, eta, horregatik, "berandutzeen neurria kontrol-mekanismoen adierazle argi gisa" ikusten du. Gainera, Ikasle Abertzaleakek azpimarratu du ekintza horiek era isolatu batean interpretatu beharrean, "hezkuntza-sistema hartzen ari den norabide orokor baten baitan" ulertu behar direla. Era berean, "berandutzeen neurriaren" aurkako 300 sinadura baino gehiago bildu arren zuzendaritzaren erantzuna ezezkoa izan dela azaldu du taldeak.
Horregatik, ikasleak martxoaren 30eko Ikasle Grebara deitu ditu taldeak, hezkuntza-sistemaren norabidea salatzeko, baita "berandutzeen neurria" kentzeko lanean jarraitzeko ere. Horrenbestez, Aixerrotako ikasleri guztiari antolatzeko deia ere egin die neurri berriaren kontra altxa daitezen.
