Gaur, martxoaren 30a, osoko bilkura deituta zegoen Getxon. Horretan, Getxoko gobernu-taldeak (EAJ eta PSE-EE) garbiketa-zerbitzuaren plegu berriak zehazteko kontratua eraman gura zuen bozketara, eta, horren aurrean, besteak beste, Elkarrekin Podemosek zerbitzu hori arautzeko dokumentua eztabaidatik kentzeko eskatu du. Izan ere, ezkerreko koalizio horren esanetan, enpresak "negoziazio kolektiborako eskubidea urratzen du".
Aitzitik, azkenean, gaia osoko bilkuretako gaietatik kendu dute, PreZero enpresagaz "hasierako akordio batera" heltzear daudela ikusi dutelako garbitzaileek, Alexanderrek zehaztu duenez. Hala, datorren martitzenean, apirilaren 4an, langileak eta enpresako zuzendaritza bilduko dira negoziaketak abiarazteko. Batzordeko kidearen berbetan, langileek gura duten bakarra da "hitzarmen duin bat, zeinean oinarrizko eskubideak beteko diren". Horregatik, apirilerako deituta zuten greba eta protestarako kontzentrazioak bertan behera utzi dituzte, "antza, bi urte eta gero akordio batera helduko garelakoan".