Ekimen horren bitartez euskal kultura sektoreari lagundu gura zaio, alderdi profesionala, baliabideak eta zuzkidura ekonomikoa eskainiz antzerki-lanak, obra koreografikoak, eszenikoak edo performatiboak ekoizteko eta muntatzeko. Aldi berean, sormen-prozesua Getxoko herritarrei hurbildu gura zaie, kulturan duten ezagutza, esperientzia eta parte hartzea hobetze aldera. Egoitzan, gainera, hiru topaketa egingo dituzte Getxoko herritarrakaz eta herriko taldeakaz. Azken horien kasuan, konpainia profesionalen eta tokiko kultura-sektorearen arteko elkarrekintza sustatu gura da.
Hautatutako ikuskizuna ekoitzi eta muntatzeko eta horren bitartekotza-plana garatzeko epea irailaren 4tik urriaren 1era izango da. Egonaldia Muxikebarri zentroko Arrigunaga aretoan izango da, eta 2023ko urrian estreinaldirako bi emanaldi eta obraren entsegu orokor ireki bategaz amaituko da.
Deialdian izena eman ahal izango du bere jarduera arte eszenikoen barruan garatzen duen edozein pertsona juridikok, hala nola antzezlanak, koreografikoak, eszenikoak edo performatiboak muntatzen dituzten antzerki-, dantza-, txotxongilo- eta zirku-konpainiek. Deialdiari buruzko informazio osoa udal-webgunean dago eskuragarri eta, edozein galdera egin gura izanez gero, interesdunek honako helbide elektronikora jo dezakete: programazioa@getxo.eus.