Bizkaiko 12 talde arituko dira zapatuan haurrentzako Bizkerre Cup txapelketan

Iker Rincon Moreno 2023ko api. 13a, 12:56
Deskargatu Info Ahotsak :

Bizkerreko emakumeak partidu batean, artxiboko irudian.

Zapatuan, hilaren 15ean, antolatuko du aurrenekoz Bizkerre Futbol Taldeak Bizkerre Cup txapelketa, Fadurako Bolue 2 zelaian. Horretan, haurren kategoriako Bizkaiko 12 emakume-talde arituko dira, futbol 7 modalitatean. Arduradunek azaldu dutenez, txapelketaren helburua da kluben arteko loturak estutzea eta jokalarien arteko adiskidetasuna sustatzea.

Bizkaiko zortzi futbol-elkarteko 12 taldek parte hartuko dute zapatuan Bizkerre Cup txapelketan: Igorreko Arratiak, Markina-Xemeingo Artibaik, Basauriko Kimuakek (2 talde), Bilboko Bilbao Artizarrak, Deriok, Plentziak, Larrabetzuko Uritarrak eta Bizkerre-Bizkeneskak taldeko 3 taldek.

Hasierako fasea lau taldeko hiru multzotan garatuko da, eta multzo bakoitzeko lehen eta bigarren taldeak eta hirugarren bi onenak final laurdenetarako sailkatuko dira.

Txapelketak Getxo Kirolak-en laguntza izango du, eta goizeko 09:30ean hasiko da. Sariak, aldiz, 17:00etan banatuko dituzte.

Kirolak Getxo
Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun