Euskara sustatzen duten elkarteentzako dirulaguntzak % 5 handitu ditu Getxoko Udalak

Erredakzioa 2023ko api. 28a, 10:26

Euskara sustatzen jarduten duten elkarteentzako urteroko diru-laguntzak onartu ditu Getxoko Udalak. Aurten, emandako dirua % 5eko hazkundea izan du eta, horrela, Bizarra Lepoan Euskara Elkarteak 86.940 euro jasoko ditu, Algortako Bertso Eskola (ALBE) 54.600 euro, Egizu Getxok 44.100 euro eta HIRUKA kooperatibak 67.832 euro.

Bizarra Lepoan

Bizarra Lepoan elkarteak Gehitu Kultura eta Gehitu Kirola egitasmoak jarraitzeko eta dinamizatzeko, (euskararen erabilera indartzeko kultur eta kirol esparruetan hurrenez hurren) lanak aurrera eramaten segituko du, eta Bapiruke ekimenaren barruan umeentzako aisialdiko jarduerak antolatzen, besteak beste.

ALBE

ALBE, Algortako Bertso Eskolak urtero bezala, aurrera eramango dituen jardueren artean Bertsoz Bertso egitasmoa, Abra Sariketa, bertso afariak, Balkoitik Balkoira, Bertso Saio Mundiala, Hitzaren Dantza, ALBE gala eta Bertso Eskola izango dira.

Egizu

Azkenik, Egizuk euskara ikasten ari diren pertsonen artean euskararen erabilera indartzeko antolatutako ekitaldien artean, berriro ere Berbalaguna, Kultur jarduerak, Gazte Saltsa, Literaturari lotutako jarduerak, Berbodromoa… izango dira.

HIRUKA

Uribe Kostako 100.000tik gora euskalduni zerbitzua ematen dien HIRUKA kooperatibak, atari digitala lantzeagaz batera, paperezko aldizkariaren 12 ale kaleratzen ditu urtero, tartean hiru ale berezi; udako jaiei, Gabonei eta Euskararen Nazioarteko Egunari buruzkoak. Aldizkari horietako bakoitzaren 2.500 ale banatzen dira Getxon, doan eskuratu daitezkeenak.

Kultura Getxo

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.

Egin zaitez HIRUKAlagun eta gozatu euskaraz!

Izan zaitez HIRUKAlagun