Joan den aste-akabuan, hilaren 3an eta 4an, Kataluniako Master Txapelketan munduko errekor bat eta Europako beste bi ezarri ditu Mikel Bildosola igerilari getxoztarrak. Lehiaketa Bartzelonako Club Esportiu Mediterrani-ko 50 metroko igerilekuan izan da, eta bertan aritu dira Swim Camp Getxo taldeko Edorta de Miguel, Beñat Elorriaga eta Markel Brouard kirolariak ere. Laukoteak, gainera, Espainiako bi errekor gainditu ditu errelebotan.
Markak hautsita bueltatu da Swim Camp Getxoko espedizioa Kataluniatik, sei errekor berri ezarrita. Mikel Bildosolak irabazi zuen Txapelketako igerilari onenaren saria, 50 libreko munduko errekorra (40-44 urte) gainditu ondoren, 23”14'-ko markagaz. Gainera, bere mailako 100 libreko Europako errekorra hautsi zuen birritan, 4x100 libreko erreleboko lehen postan 52”16'-ko denboragaz eta banakako proban 51”70' eginda.
Horregaz batera, Edorta de Miguelek Espainiako errekor berria ezarri zuen, 45-49 urte artekoa, 50 bizkarreko proban, 28"06'-ko denboragaz.
Hori gutxi balitz, taldeak 4x50 libreko eta 4x100 libreko erreleboetan Espainiako errekor berriak ezarri zituen, biak 160-199 urteko kategorian, Mikel Bildosola, Edorta de Miguel, Beñat Elorriaga eta Markel Brouardek osatutako laukoteagaz.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
