Udalerriko auzoetan pertsona arrazializatuek eta immigranteek bizi dituzten dinamika arrazistak salatzeko asmoz, "Mundialito Antiarrazista" egingo dute domekan, hilaren 11n, Itzubaltzeta/Romon. San Nikolas Zabalik, Sortarazi eta Pertsonalde elkarteek antolatu dute ekimena.
Getxon ematen diren dinamika arrazistak salatzeaz gainera, antolatzaileek azaldu dute harrera-sistema duin bat aldarrikatu gura dutela, baita jatorri ezberdinetako gizon-emakumeen topagune bat sortzea ere. Horretarako, futbol-partiduez gainera, bazkariak, dantzak eta bestelako ekimenak egingo dituzte domekan, Gobelaurre kaleko Romo Eskolan.
Daborduko taldeak osatzeko izen-emateak amaituta daude, baina azken momentuan egunaz gozatzera joan gura duten auzokide guztientzako deia egin dute antolatzaileek.
Egun osoko egitaraua prestatu dute horretarako:
- 09:00-10:00 Gosaria.
- 10:00-14:00 Futbol-partidak.
- 14:00-15:00 Bazkaria.
- 15:00-16:00 Finalerdia eta finala.
- 16:00-19:00 Animazioa eta sari-banaketa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
