Udalerriko auzoetan pertsona arrazializatuek eta immigranteek pairatzen dituzten dinamika arrazistak salatzeko helburua duen lehenengo "Mundialito Antiarrazista" egin zuten atzo, domekan, Romo Eskolan. Horrez gainera, San Nikolas Zabalik, Sortarazi eta Pertsonalde elkarte-antolatzaileek azaldu dutenez, asmoa zen harrera-sistema duin bat aldarrikatzea eta jatorri ezberdinetako gizon-emakumeen topagune bat sortzea. Guztira, 130 pertsona inguru elkartu ziren ekimenean eta, esperientziaren ondoren, ekimenari jarraikortasuna ematea aurreikusi dute arduradunek. Hona hemen atzoko egunak utzitako hainbat irudi.
Antolatzaileek azaldu dutenez, futbola erreminta gisa baliatu dute jendea biltzeko, "hotsak batzen dituen kirola" delakoan. Hala, atzo, "deserosotasuna" sentiarazten duten pertsonak batu ziren futbolaren inguruan, "egitura arrazista duen sistema baten oinarriak zalantzan jartzen dituztenak", hain zuzen.
Horrez gainera, "bizitzak kentzen dituen" Atzerritartasun Legea deitoratu zuten, "azken finean, hesietan, CIEetan, soroetan eta kaleetan heriotzara kondenatzen gaituen legea da". Hori dela eta, futbol-pilotaren inguruan jatorri ezberdinetakoak batzeaz gainera, hainbat aldarrikapen ere mahai-gaineratu zituzten, hala nola justizia Melillako sarraskian hildako pertsonentzat eta justizia gurera etortzen diren adingabeentzat, zaintza behar dutelako eta ez abandonatuta utzi.
Era berean, azpimarratu zuten gurera etorritako gizon-emakumeen seme-alabek gure gizartearen parte direla, eta onar dadila herri hau jatorri, ohitura eta erlijio ezberdinetako herrien batura dela.
Argazkiak: © SAN NIKOLAS ZABALIK
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun