Doako yoga saioak eskainiko ditu Getxo Kirolak-ek uztailaren 2tik urriaren 22ra, Ereaga hondartzan. Klaseak ordubetekoak izango dira, goizeko 10:00etatik aurrera. Saiook domekaro izango dira, eta publiko eta adin guztiei zuzenduta egongo dira. Hartara, ez da beharrezkoa aldez aurretik izena ematea, ezta esperientziarik izatea ere. Hala ere, norberak bere toalla eraman beharko du.
Yoga saiook “Gimnasia kostaldean” programaren barruan kokatu dute arduradunek. Programa horretan, belaunaldien arteko ikuspegia duen kalistenia, gimnasia eta aquagymeko eskolak ematen jarraituko da. Kalisteniaren kasuan, klase horien udako egunak uztailaren 1ean eta 8an eta abuztuaren 5ean eta 12an izango dira. Entrenamenduek ordu eta erdiko iraupena izango dute, 10:00etatik aurrera, Txurrukako kaian.
60 urtetik gorako pertsonei zuzendutako gimnastika eta aquagym eskolei dagokienez, entrenamenduak astelehenetik barikura egiten dira, 10:00etatik 11:00etara. Horrela, astelehen eta eguaztenetan, Txurrukan ematen dira; martitzen eta eguenetan, Ereagako kirol parkean (eguenetan 11:15etik 12:00etara hondartzan aquagym-enak egiten dira); eta barikuan La Bola hondartzaren ondoan dagoen parkean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
