Uztaileko ohiko osoko bilkuran bozkatu dute Getxoko Udalak Bizkaiko Ur Partzuergoan izango duen ordezkaritza. Getxok hiru ordezkari ditu erakunde horretan, eta udal hauteskundeetako emaitzak kontuan hartuta (EAJk 9, PPk 6, EH Bilduk 6, PSE-EEk 3 eta Elkarrekin Podemosek 1), koalizio abertzaleak azpimarratu du ordezkaritza honakoa izan beharko litzatekeela: "EAJk 1, PPk 1 eta EH Bilduk 1".
Hauteskundeen emaitzak horiek izan ziren arren, EH Bilduk jakinarazi du gobernu-taldeak proposatu zuela bere taldea baztertzea eta hirugarren ordezkaria PSE-EEkoa izatea. "EH Bilduk 7.590 boto lortu zituen aurreko udal-hauteskundeetan, eta PSE-EEk 3.887", azpimarratu dute koalizioko kideek.
EH Bilduko bozeramaile Mikel Bildosolak salatu duenez, "gobernu-taldea ez da herriaren borondatea errespetatzen ari. EAJk eta PSEk ez dute jada gehiengo osorik Getxoko Udalean, eta EH Bildu ahalik eta erakunde gehienetatik kanpo uzteko helburuari eusten diote, PPren laguntzarekin noski. Dirudienez, ez da ezer aldatu EAJren jarrera autoritarioan; bitartean, PSEk jarraitzen du Udaletik ahalik eta baliabide handiena ateratzen saiatzen, horretarako getxoztarrek hautetsontzietan adierazitako borondatearen aurka egin behar bada ere".