Koalizio abertzaleak gogoratu duenez, etxebizitza da Getxok pairatzen duen arazo larrienetako bat eta getxoztarren kezka garrantzitsuenetako bat. Izan ere, azpimarratu duenez, alokairuen eta etxebizitzen salmenta prezio altuen ondorioz, getxoztar askok herria utzi behar izaten dute, "Getxon Euskal Herri osoko preziorik garestienetakoak ditugulako".
EH Bilduk etxebizitzari lotutako hainbat proposamen aurkeztu ditu azken urteotan, "gobernu-taldeak (EAJ eta PSE-EE) ez baitu etxebizitza-plan integralik bultzatu arazoari aurre egiteko". Hala, urte politiko berriari hasiera emateko, EH Bilduk iragarri du mozio bat aurkeztuko duela iraileko osoko bilkuran, Getxo "tentsio handiko gune" gisa izendatu ahal izateko azterketa bat egiteko eskatuz, Etxebizitza Lege berrian oinarrituz, eta Donostia edo Errenteria bezalako herrien urratsak jarraituz. Horrela, besteak beste, herrian alokairuaren prezioak mugatzeko urratsak has litezke", azaldu dute koalizioko kideek.
🗣️ Ane Larrakoetxea zinegotzia: "EH Bildutik proposatuko dugu Getxo tentsio handiko gune izendatzeko azterlana egitea. Horrela, alokairuaren prezioei muga jartzeko lehenengo pausuak eman ahalko ditugu. Ezinbestekoa da berehala neurriak hartzea".
— EH Bildu Getxo (@GetxokoEHBildu) September 15, 2023
Info 📲 https://t.co/myUQnE4uXG pic.twitter.com/sfYNFe0x4a
Mozioa aurkezteaz gainera, EH Bilduk kanpaina bat ere egingo du Getxoko etxebizitzaren arazoaren ondorioez ohartarazteko. Mikel Bildosola EH Bilduren bozeramaileak salatu duenez, "gazteen exodo larria bizi dugu, izan ere, herriko gazteek alde egin behar dute, etxebizitza prezio bideragarririk aurkitzen ez dutelako". Ildo horretan, Bildosolak azpimarratu du bizilagun askok soldataren % 30 baino gehiago erabili behar izaten dutela alokairua edo hipoteka ordaintzeko, "prekarietatea eta gizarte-bazterketa eraginez".
Horregatik guztiagatik, EH Bilduk mozioa babesteko eta Getxon alokairuaren prezioak mugatzeko aukera errazteko deia egin die Udalean ordezkaritza duten gainerako indar politikoei: "Akordioa posible izan da Donostian, Errenterian, Eibarren eta Irunen, besteak beste. Ez litzateke ulertuko Getxon akordioa ezinezkoa izatea, bizi dugun egoeraren larritasuna kontuan hartuta ".
Era berean, Getxo "tentsio handiko gune" gisa izendatzeko azterlana eskatzeaz gainera, EH Bilduk etxebizitzari lotutako proposamen integralak egiten jarraituko duela azpimarratu du, hala nola alokairu sozialari erabateko lehentasuna ematea sustapen berri guztietan, pisu turistikoen irekiera mugatzea, etxebizitzen bereizketa eta birmoldaketa erraztea, gazteen emantzipaziorako laguntzak handitzea eta Udal Etxebizitza Bulegoa sortzea.