Getxoko Udalak zehapen-espedientea irekiko dio udalerriko arrapala-mekanikoak mantentzen dituen enpresari, eta 21.320 euroko zigorra ezarriko dio kontratua gaizki gauzatzeagatik. Izan ere, iturriek azaldu dutenez, enpresa horrek ziurtatu behar du arrapalen funtzionamenduak denborak jarraituko duela, 07:00etatik 23:00etara, gerta daitezkeen matxurak aurreikusiz, baina arrapala bakoitzeko hileko prestasuna bermatuz.
"Kontratuaren jarraipenean, nabarmen murriztu da kontratua arautzen duten baldintza teknikoak betetzea, eta horrek eragina du instalazioen erabilgarritasunean eta zerbitzua behar bezala ematean”, Janire Ocio Azpiegitura, Obra eta Zerbitzuetako zinegotziak azaldu duenez.
Iturrien arabera, Udalak askotan eskatu dio enpresari kontratuaren baldintza-agirietan jasotako betebeharrak eta konpromisoak betetzeko eta ekipoak azkar konpontzeko, baina ez dira lortu gura ziren ondorioak. “Oraintsu izugarri luzatu da duela hilabete batzuk sortu ziren matxura batzuen konponketa: Bidezabal kaleko 1. eta 3. arrapalan (orain martxan daude, berriz ere). Salsidun 1. eta 4. arrapaletan lanean ari dira berehalako konponbide bat lortzeko”, gaineratu du Ociok.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
