Dibertsitate funtzionala edota desgaitasuna duten pertsonen eskubideak eta ongizatea sustatzeko jardunaldia egingo dute abenduaren 3an

Erredakzioa 2023ko aza. 24a, 11:10
Besteak beste, Inazio Nieva dibulgatzaileak parte hartuko du ekimenean.

Astebete barru, abenduaren 3an, Dibertsitate Funtzionalaren edota Desgaitasunaren Eguna dela-eta, Getxoko Udaleko Gazteria eta Zahartze Aktibo zerbitzuek jardunaldi berezi bat egingo dute Romo Kultur Etxean, 12:00etatik aurrera.

Datorren igandean, abenduaren 3an, Dibertsitate Funtzionalaren eta/edo Desgaitasunaren eguna dela eta, Getxoko Udaleko Gazteria eta Zahartze Aktibo zerbitzuek jardunaldi bat antolatu dute Romo Kultur Etxean, dibertsitate funtzionala eta/edo desgaitasuna duten pertsonen eskubideak eta ongizatea sustatzeko gizarteko esparru guztietan.

Ekitaldia 12:00etan hasiko da, baina irekiera ordu erdi lehenago egingo dute. Hala, besteak beste, Sökole perkusio taldeak eta Getxotarrok taldeak emanaldi bat eskainiko dute; ondoren, Arantza Lertxundi psikologoak eta Inazio Nieva inklusioaren eta aniztasunaren inguruko dibulgatzaileak hartuko dute hitza.

“Politika inklusiboetan aurrera egin behar da eta bizitzaren eremu guztietan diskriminazioaren aurka borrokatu. Jardunaldiaren leloak dioen bezala, 'Guztion kontua da` gizarte osoari dagokigun gaia da, eta Udalak inklusioarekin eta pertsona guztien aukera-berdintasunarekin dugun konpromisoa adierazi nahi du”, bat etorri dira Mihaela Jilavu eta Carmen Diaz Gazteria eta Zahartze Aktiboko zinegotziak, hurrenez hurren.

Ekimenerako edukiera mugatua denez, beharrezkoa izango da aldez aurretik izena ematea Gazte Informaziorako Bulegoan: 688 880 985 telefonora deituta edo gaztebulegoa@getxo.eus emailaren bitartez.

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun