Horrez gainera, udalbatzan egondako hiru taldeen aldeko botoakaz, 37.000 euroko beste kreditu gehigarri bat onartu zuten, Romoko Ibar Nagusien Etxea elkarteari hitzarmena zabaltzea finantzatzeko, "elkarte horren espazio-beharrei erantzuteko".
Bestalde, aho batez onartu zuten ere funtzionarioen, lan-kontratuko langileen eta Alkatetzako eta alderdietako aholkularien oinarrizko ordainsarien eta ordainsari osagarrien % 0,5eko igoera gehigarria 2023rako. Era berean, Udaleko Bozeramaileen Batzordeak Emakumeen aurkako Indarkeria Ezabatzeko Nazioarteko Eguna dela-eta onartutako Adierazpen Instituzionalaren berri eman zuten.
Elkarrekin Podemos eta EH Bildu taldeek deitoratu dute osoko bilkura greba feminista orokorraren egunean egin izana eta, besteak beste, nahiz eta horren berri eman, hitzordua dataz aldatzeko eskatu eta grebagaz bat egingo zutela adierazi, salatu dute gobernu-taldeak ez zuela egunez aldatzeko aukerarik eman.
Zaintza negozioa ez dela eta gaur greba eguna dela ozen oihukatzen ari dira Getxoko udaletxearen barruan.
— Hiruka (@HirukaEus) November 30, 2023
“zaintza sistema publikoa, orain!” aldarrikatu dute.#A30GrebaFeministaOrokorra #ZaintzaEskubideKolektiboa #PribatizaziorikEz #ZaintzaSistemaPublikoaORAIN pic.twitter.com/M5RD8UH18M
TAO
Osoko bilkuran, Euskal Autonomia Erkidegoko Auzitegi Nagusiaren epaiaren berri eman zuten, TAO zerbitzua esleitzeko espedientearen eskaintzak baloratzeko puntura atzera eramateko. PPk adierazi zuenez, esleipen horren aurka agertu zen, eta deitoratu zuen TAOk enpresa aldatzea ekarriko duela; "beraz, kalte-ordaina eman beharko zaio galera ekonomikoengatik”. Gobernuak adierazi zuenez, “eskaintza ekonomikoan balio anormalengatik” baztertu zen enpresa, “eta KEAO (Euskadiko Kontratuen inguruko Errekurtsoen Administrazio Organoa) bat etorri zen horrekin, udalaren jardueraren aldeko ebazpena eman baitzuen. Orain, EAEAN ez dator bat horrekin. Beraz, desadostasun juridikoak daude KEAOren eta EAEANren artean”.
Mozioak
PPk bi mozio aurkeztu zituen. Lehenengoa, Algortako Sarrikobasoko lursailak erosteari buruzkoa, inguru horretan erortzeko zorian dauden eraikinen konponbide gisa. Gobernu Taldeak (EAJ eta PSE-EE) transakzionatu zuen mozioa, eta onartutako testuak honako hau adierazten du: “mozioaren xede den Sarrikobaso kaleko higiezinetako bat edo batzuk erostea erabakitzen bada, jabetza-eskubidearen eta hirigintza- eta etxebizitza-araudiaren ondoriozko administrazio-prozedurak betetzearen emaitza izango da”. Mozioak nabarmentzen du, halaber, “erositakoaren xedea HAPOren berrikuspenean finkatu dadila, Katea-Puerto Orduña jarduketa integratuaren interes orokorrak zehaztutako helburuekin bat etorriz, eta, nolanahi ere, ondoriozko babes publikoko etxebizitzen egokitasuna, berdegune egoki baten zuzkidura eta eremuaren irisgarritasun unibertsaleko arazoen konponbidea bermatu behar direla”.
PPren beste mozioa, “Muxikebarriko Laguna” txartela sortzeko, EAJren eta PSE-EEren abstentzioagaz onartu zen.