Zu non, han DA! egitasmoa 2020an sortu zen, Durangoko Azokak euskal kulturgintzan sorrarazten duen dinamikaren indarra aprobetxatu eta euskal literaturaren urteko produkzioaren uzta Euskal Herri osora zabaltzeko asmoz. Hala, Euskal Herri osoko 88 liburu-dendek parte hartuko dute egitasmoan, eta, gainera, 27 dendatan liburu aurkezpenak egingo dituzte, abenduaren 11n hasi eta 20an amaituko den aurkezpen-zirkuituaren barruan.
Aurkezpen horietatik guztietatik, lau Getxon izango dira asteon. Lehena gaur izango da, eguaztenean, Itzubaltzeta/Romoko Casal liburu-dendan. Bertan izango da Miriam Luki, 18:00etatik aurrera, Mikel Ayerbegaz solasaldian Argialdiak (Susa) ipuin-bilduma aurkezteko. Bere estreinako liburuan, maitale,
lagun, senide zein klase arteko harremanen ertzak behatu ditu.
Abenduaren 16an, zapatuan, Harkaitz Canok bere poema liburu berria aurkeztuko du, Ulu egiteko bolondres bila (Susa) izenekoa. Casal dendan izango da honako hau ere, eguerdiz, 12:00etan. Canoren azalpen eta errezitaldiaz gainera, Jon Pirisen zuzeneko musika ere entzun ahalko da bertan.
Hurrengo egunean, domekan, aurkezpen bikoitza hartuko du Getxogasoko saltokiak, 19:00etan. Batetik, Olatz Mitxelenak Arrain hezur bat eztarrian lanaren berri emango du. Igartza sariketari esker ondutako ipuin liburua da. Bestetik, Pantailen garaipena (Elkar) saiakera dakar Iñigo Martinezek; egungo gizartean pantailek duten eraginaz informatzen eta hausnartzen duen lana.