Argia Fundazioak, gaixotasun mentala duten pertsonei laguntzen dien erakundeak, bazkari bat antolatuko du Getxon, askotariko tailerrakaz eta musikagaz, gura gabeko bakardadean dauden pertsonentzat. Ekimena bihar, zapatuan, izango da, 11:00etatik 19:00etara, fundazioaren Algortako eguneko ospitalean. Guztira, 100 pertsonentzako bazkaria aurreikusi dute.
"Jende askorentzat eta kolektibo askorentzat, batez ere bazterketa-egoerei aurre egiten dietenentzat, Gabonak ondoezaz eta bakardadeaz betetako urte-garaia dira", adierazi du Argiak ohar batean. Hori dela eta, erakundeak ekimen hau martxan jartzea erabaki du, 100 bat lagun har ditzakeena. "Egun honetan parte hartu nahi duten dohaintzak eta boluntarioak lortzeko kanpaina bat abiarazi dugu. Hogei lagun baino gehiago bildu dira egunean laguntzeko eta dohaintza ekonomiko ugari egin dira ekitaldia burutzeko", azaldu dute antolatzaileek. Jardunaldiak hainbat tailer, zumba, makramea, gominola loreak, musika eta magia, eta Peñascal Kooperatibaren catering bat izango ditu.
Getxoko Udalak eta San Nikolas Zabalik, Sortarazi, Caritas eta Zabalketa elkarteek lagundu dute Gabonetako otordu hau egi bihurtzeko.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
