Getxoko Udaltzaingoak nabarmendu duenez, abenduaren 31tik urtarrilaren 1erako gau berezian portaera "eredugarria" izan zuten auzokide gehienek, eta gorabehera "gutxi" zenbatu zituen. Guztira, 00:00etatik 08:00etara arteko operatiboan, 19 gertakari zenbatu zituzten udaltzainek, tartean alkoholaren eraginpean gidatzeagatik, adingabeei alkohola saltzeagatik eta musika-orga bategaz festa bat muntatzeagatik hainbat salaketa.
Udaltzaingoak abian jarritako operatiboa 00:00etan hasi zen, eta 08:00ak aldera amaitu zen. Iturriek azaldu dutenez, "garrantzi txikiko" 19 gertakari izan ziren guztira, eta horietatik hurrengoak nabarmendu dituzte: Itzubaltzeta/Romon edukiontzi batean izandako sute bat; alkoholemia- eta droga-kontrolen kanpainaren barruan, pertsona bat ikertu zuten, gidatzea eragozten zion agindu judiziala urratzeagatik, eta beste bat salatu zuten baimendutako alkoholemia-mugak gainditzeagatik; bi lokal salatu zituzten, bat adingabeei alkohola saltzeagatik eta bestea musika-ordutegia ez betetzeagatik, eta bost pertsona salatu zituzten bide publikoan musika-orga bategaz festa bat muntatzeagatik.
"Gure ustez, urteko sarreraz udalerriko auzoetan gozatu duten pertsona gehienek modu eredugarrian egin dute", nabarmendu du Keltse Eiguren Herritarren Segurtasuneko zinegotziak.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
