Getxolive Pro talde eta bakarlari getxoztarrentzako laguntza da, entseguak egiteko eremuak, profesionalki hornitutako estudio batean musika-konposizioak grabatu, musikaren edo kulturaren sektoreko profesionalen aholkularitza eta prestakuntza, edo musika-lanak argitaratu edo bideoklipak ekoizteko. Helburu horiek lau laguntza-modalitatetan hedatuko dira. Lehenengoa, Romo Kultur Etxeko entsegu-areto intsonorizatuak erabiltzera bideratuta dago, eta ekipamendu horiek erabili ahal izateko 100 orduko 10 poltsa diruz laguntzean datza. Bigarrenak, berriz, 40 orduko 10 poltsa eskaintzen ditu, zentro bereko grabazio-gela doan erabili ahal izateko, eta, horrez gain, soinu-teknikari baten asistentzia ere eskainiko da.
Hirugarren modalitatea kultura kudeatzeko eta musika sortzeko, ekoizteko eta zabaltzeko aholkularitza edo laguntza profesionalari zuzenduta dago, bandek edo bakarlariek interpretazioaren eta kudeaketaren esparruan egiten duten lana hobetze aldera. Horretarako, 3.000 euroko lau diru-laguntza eskainiko ditu egitasmoak. Azkenik, laugarrenaren bidez, zenbateko bereko beste lau diru-laguntza emango dituzte, bideoklipak finantzatzeko eta musika-lanak argitaratzeko.
Guztira, deialdiak 24.000 euro bideratuko ditu gehienez, eta zenbateko horri gehitu behar zaizkio soinu-teknikari baten zerbitzuak (gehienez 400 orduko paketeagatik), bai eta RKEren entsegu- eta grabazio-aretoen lagapena ere.
Deialdirako eskabideak era telematikoan aurkeztu ahal izango dira Getxoko Udalaren erregistro elektronikoaren bidez (https://eudala.getxo.eus). Deialdiaren dokumentazio osoa hemen eskura daiteke: www.getxo.eus/kulturadeialdiak