Herri kirolen bitartez, maiatzaren 26an izango den Ibilaldiaren berri eman zuten atzo, domekan, Biotz Alai plazan. Getxo Herri Kirolak taldeak bideratu zuen topaketa, eta bertan aritu ziren lehian udalerriko 50 kirolari, sei taldetan banatuta. Eguraldiak lagunduta, plaza jendez lepo egon zen, 150-200 pertsona inguru batuta. Horrez gainera, Bizkaiko ikastolen aldeko jaialdiaren arropa salgai egon zen postutxo batean.
Algortako San Nikolas Ikastolak antolatuta, eta Getxo Herri Kirolak taldeak bideratuta, udalerriko kirol talde ezberdinetako 50 kirolari aritu ziren atzo Algortako erdigunean desafioan. Sei taldetan banatu ziren elkarren aurka aritzeko: udalerriko futbol taldekoek osatutakoa, Getxo Rugbyko errugbilariak, Getxoko Pilota Elkarteko pilotariak, Swim Camp Getxoko igerilariak, Etorkizuna Mendi Taldeko korrikalariak eta Haszteneko kideak. Horiek guztiek hainbat erronkari aurre egin behar izan zioten, hala nola harri-altxaketa, giza-proba eta sokatira; eta 200 ikusle inguru bertaratu ziren norgehiagoka horiek ikustera. "Jai giro ederrean burutu zen dena", azpimarratu dute antolatzaileek.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
