"Getxo Athleticegaz" lelopean, apirilaren 6an, zapatuan, 18:00etatik aurrera, Itzubaltzeta/Romoko Santa Eugenia plazan eta Algortako Telletxe plazan askotariko kirol- eta aisialdi-jarduerak egongo dira, Athletic Clubek eta RCD Mallorca taldeak jokatuko duten Errege Kopako finalaren aurreko orduak girotzeko. Gainera, plaza horietan pantaila erraldoiak ere ipiniko dituzte 22:00etan hasiko den norgehiagoka zuzenean ikusi ahal izateko.
Partidaren aurreko jarduerak 18:00etatik 20:30era izango dira. Tarte horretan, puzgarria, 3ko futboleko kantxa, Herri Kirolak gunea eta makillaje-eremua egongo dira gozagai, baita zumba klase bat ere auzo bakoitzean. Jardueretako batzuek bertoko elkarte eta kirol-kluben laguntza izango dute.
Eguraldi txarra eginez gero, ekitaldi guztiak eta partidaren emanaldia Gobela eta Fadura kiroldegietara lekualdatuko dituzte.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!