Ertzaintzak 37 urteko gizonezko bat atxilotu zuen atzo, domekan, Algortan, beste bat arma zuri bategaz sastatu zuelakoan. Eusko Jaurlaritzako Segurtasun Sailak jakinarazi duenez, horrez gainera, bigarren pertsona bat ere dago eraso horretan nahastuta, 29 urtekoa, eta, ikertu gisa, aske utzi dute. Biktimak zauri bat zuen toraxean, eta Gurutzetako ospitalera eraman behar izan zuten.
Iturriek azaldu dutenez, erasoa domeka goizaldean izan zen, borroka baten baitan, eta biktima toraxean zauritu zuen erasotzaileak. Ertzaintza eta osasun langileak erasoa izan zen lekura bertaratu ziren, eta biktima artatu eta ospitalera eraman ostean, poliziek ikerketa abiatu zuten. Hala, handik ordu batzuk beranduago, erasoaren ustezko egilea aurkitu zuten, gertuko etxebizitza batean.
Hori horrela, Ertzaintzaren patruila bat Algorta etorbideko etxebizitzara sartu behar izan zen, bertan baitzegoen ustezko erasotzailea ezkutatuta.
Atxilotutako gizona, 37 urtekoa, ertzain-etxera eraman zuten dagozkion eginbideak egiteko, eta Getxoko Guardiako Epaitegiaren esku utzi dute. Horrez gainera, 29 urteko beste gizon bat ikertu dute, erasoagaz zerikusia duelakoan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
