Berbodromoaren 13. edizioa datorren maiatzaren 23an, eguenean, ospatuko da: goizez, Itzubaltzeta/Romon; eta arratsaldez, Algortan. Ohi bezala, Getxoko Udalaren laguntzagaz, Egizu eta Bizarra Lepoan elkarteek eta udalerriko euskaltegiek antolatutako ekimenaren helburuak dira euskara giro lasaian kalera ateratzea, euskararen erabilera indartzea eta indar-erakustaldia egitea, besteak beste.
Itzubaltzeta/Romoko hitzorduak 09:00etan eta 11:00etan izango dira, Santa Eugenia plazan, eta Algortakoa, 18:00etan, San Nikolas plazan. Lauko taldeak osatuko dira eta talde bakoitzean dinamizatzaile bat eta hiru parte hartzaile izango dira. Taldeetan euskara ikasten ari den jendea euskara dakienagaz elkartuko da, hurrengo gaiei buruz mintzatzeko: "Futbola versus beste kirolak", "Getxon ume gutxiago eta maskota gehiago" eta "Ibilaldia, fiesta de las ikastolas de Bizkaia".
Interesatuek izena eman beharko dute www.egizu.eus webgunean dagoen formularioan, 619 935 541 zenbakian edo plazan bertan.
Egunari amaiera emateko, kantuz ibiliko dira Algortatik.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
