Alfajorra zer den ondo dakite Noelek eta Baltazarrek; argentinarrak biak, duela 22 urte etorri ziren gurera, eta, aitortzen dutenez, Euskal Herrian gozoki asko eta "kalitate handikoak" dauden arren, alfajorra jaki soil bat baino gehiago dela azpimarratzen dute biek, "etxera eta haurtzaroko oroitzapenetara bueltatzeko atari bat da. Han, Argentinan, alfajorrekin batera koskortzen dira umeak". Hala, herrimin eta sentimendu horiei helduta, "eta hemen benetako alfajorrak ez zeudela ikusita", haien indarrak batu eta Alfajores Brutales proiektua jarri zuten martxan, 2019an. "Argentinatik gozo hauek ekartzen genituenean, bertokoei probatzen ematen genizkien, eta asko gustatzen zitzaien. Ez genuen ulertzen nola ez zegoen mota honetako eskaintzarik hemen", diote. Hala, merkatu-hobi bat aurkitu, eta ekin zioten.
Baltazar Galdakaoko Andra Mari jatetxe ospetsuko chefa da, eta, Noelegaz batera, sukaldaritzarekiko grina eta jaioterriaren nostalgia hori uztartu ditu. Hala, esperimentazioaren ondoren, gozoki argentinarra euskal ahosabai finera egokitzea lortu dute, zaporeak eta egiturak orekatuz bertoko "bezero zorrotzak" asetzeko. "Dena batu genuen, esperientziak, oroitzapenak... Baina lortu dugulakoan gaude; milaka proba egin ditugu, hamaika gaileta-aldaera sortu ditugu, eta lortutako produktua primerakoa delakoan gaude". Eta erantzuna ezin hobea da; inguruko hainbat taberna, jatetxe eta dendatan aurki daitezke, aurkezpen paregabe bategaz, dultzearen mundura salto egin gura duenaren zain. Izan ere, diotenez, "beti da momentu on bat alfajore bat jateko".
Nabarmentzen dute haien produktua ez dela argentinarrei begirakoa, baizik eta bertokoei zuzenduta dagoena. Algortan egiten dituzte, eskuz, eta hamaika aukera eskaintzen dituzte, baita beganoentzako ere; "merkatu honetan izugarrizko harrera ona izan dugu, eta hori eskertzekoa da, izugarrizko lana baita haientzako produktua sortzea", gaineratu du Noelek.
Inguruko taberna, jatetxe eta dendetan saltzen dituzte, Uribe Kostan, baina baita Euskal Herriko beste hainbat lekutan ere. Harro, "hemendik munduarentzat" direla aldarrikatzen dute, baina haien merkatua Euskal Herrian kontzentratzen den arren, euren produktuak ez du mugarik, zaporea kulturen arteko zubia baita. Are, iaz, euren lanak mugak gainditu zituen, Argentinako Munduko Txapelketan lehiatu zutenean. "Hemendik hara bidali genuen gozokia, milaka kilometro egin zituen, eta, irabazi ez genuen arren, ondo lotu ginen".