Ertzaintzak, Getxoko Udaltzaingoaren laguntzagaz, bost adingabe atxilotu ditu, bart Algortan gazte bat hil dutelakoan. Biktima arma zuri bategaz zauritu zuten, eta, ondoren, ospitalera eraman eta bertan hil da, jasandako lesioen ondorioz.
Eusko Jaurlaritzako Segurtasun Sailaren arabera, istiluak 23:20 aldera hasi ziren Satistegi plazaren inguruetan. Hainbat lekukok Ertzaintzari jakinarazi zioten gazte bat zaurituta zegoela, labankada bat jaso ondoren. Larrialdi zerbitzuak bertaratu zirenean, zauri larriakaz topatu zuten 23 urteko mutila, eta Gurutzetako ospitalera eraman zuten. Hala ere, osasun langileek ezin izan zuten ezer egin gaztearen bizitza salbatzeko, eta bertan hil da.
Gauerdia baino lehen, Ertzaintzak eta Getxoko Udaltzaingoak bost adingabe aurkitu zituzten, Algortako metro geltokian, eta, erasoagaz lotura zutelakoan, unean bertan atxilotu zituzten. Geltoki horretako zaborrontzi batean odol arrastoak zituzten labana bi topatu zituzten, polizia-iturrien arabera, erasoa egiteko erabili zituztenak.
Getxoko ertzain-etxeak ikerketa ireki du hilketa hori argitzeko, eta domeka goizean hilketa izan den lekura eraman dituzte atxilotutako bost gazteak, gertatutakoa argitzeko asmoz.
‼️ Bart Algortan gazte bat hil da labankada baten ondorioz.
— Hiruka (@HirukaEus) May 26, 2024
Erasoa gogor gaitzetsi du @GetxoUdala-ko alkate Amaia Aguirre Ibilaldiaren hasieran: "Getxon ez ditugu horrelako jokabideak onartzen" pic.twitter.com/QeaX81L0yT
Gaur, domekan, Ibilaldiari hasiera emateko ekitaldian, Amaia Agirre Getxoko alkateak gogor salatu du bart gertatutakoa, eta azpimarratu du Getxo "herri baketsua" dela, askotarikoa eta auzokideen artean bizikidetasuna egunero lantzen duena. Era berean, hildakoaren familiari bere "gertutasuna eta elkartasuna" adierazi dio.