Getxoko Udalak, Eusko Jaurlaritzako Osasun eta Kontsumo Saileko Osasun Publikoaren eta Adikzioen Zuzendaritzagaz lankidetzan, alkoholaren eta beste droga batzuen kontsumoari lotutako arriskuen murrizketari buruzko online prestakuntza bat antolatu du uztailaren 9rako, udako jaiak hurbil daudela eta.
Saioan langileei alkoholaren kontsumoaren inguruko arrisku-egoerak detektatzeko gaitasuna hobetzeko jarraibideak eskainiko dizkiete, bereziki adingabeen, bezero intoxikatuen edo gidatuko duten pertsonen kontsumoaren kasuan, eta horren arabera jarduteko. Era berean, gaueko ohiko kontsumo-drogen ezaugarriei, ondorioei eta arriskuei buruzko ezagutza espezifikoak ere aipatuko dira baita arriskuak murrizteko jarraibideak ere.
Gainera, azkenaldian jarrera eta eraso sexistak eta sexu-erasoak, lapurretak edo estortsioak egiteko mendekotasun kimikoaren erabilera bezalako gaiek hartu duten gorakada eta garrantzia ikusita, erakunde publikoek horri buruz antolatu dituzten jarduera-protokoloakaz eta gidakaz lotutako edukiak landuko dituzte.
"Ostalaritza alorrekoak eta jai-batzordeak parte hartzera animatzen ditugu, guztion artean jai parekideak, parte-hartzaileak, seguruak eta indarkeriarik gabekoak, eta pertsona guztiok gozatzeko modukoak eraikitzeko helburuarekin”, nabarmendu du Carmen Diaz Gizarte Kohesioko zinegotziak.
Udalak aste honetan prestakuntzari buruzko informazioa bidali die ostalaritzako 300 bat establezimenduri eta udalerriko jai-batzordeei. Hala, parte hartu gura dutenek, uztailaren 2a baino lehen erantzun beharko diote helbide elektroniko honi (gizartez@getxo.eus ), izen-abizenakaz, ostalaritzako lokala edo jai-batzordearen izenagaz, harremanetarako telefonoagaz eta helbide elektroniko bategaz.