Getxoko Ereaga eta Arrigunaga hondartzak batu egin dira Kerik gabeko hondartzak sarera eta, hala, domekan, uztailak 14, kontzientziazio jardunaldia egingo dute horietan. Eusko Jaurlaritzaren, Foru Aldundien eta Udalen arteko lankidetza-ekimena da, "Tabako kerik gabeko Euskadi" estrategiaren barruan, eta, aurten, Getxo batu egin da, ingurune osasungarrien sorreran aurrera egiteko, tabakoaren kontsumoa desnormalizatzeko eta zigarrokinek ingurumenean eragiten duten kaltea saihesteko.
“Ekimenaren helburuak dira erretzaile ez diren pertsonak babestea, batez ere adingabeak; zigarrokinak hondartzetan ohikoenak diren objektu kutsatzaileak izatea saihestea; aisialdirako gune horiez gozatzea osasunarekin eta ongizatearekin bateragarri eginez, eta ingurunearen erakargarritasun naturala handitzea. Horregatik, herritar guztiak sentsibilizatu nahi ditugu ekimen honen parte izateko, eta, horrela, guztion osasuna hobetu, batez ere adingabeena“, nabarmendu du Carmen Diaz Gizarte Kohesioko zinegotziak.
Domekako ekintza nagusia izango da hondartzan ez erretzeko gonbita egitea eta, horretarako, informazio-stand bat jarri eta informazio-kartelak eta -materiala banatuko dira bi hondartzetan. Arrigunaga hondartzan, ordutegia 10:30etik 13:30era izango da, eta Ereagan 16:00etatik 19:00etara.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
