Getxoko Udalak bederatzi radar pedagogiko jarri ditu ibilgailuen abiadura kontrolatzeko. Horiek Ormaza, Santa Marina, Bidezabal, Maidagan, Zientoetxe, Eduardo Coste eta Arene kaleetan, eta Areetako etorbidea eta Algortako etorbidean daude. Radarrak 30 km/h-ko abiadura-mugara programatu dira, Algortako etorbidekoa izan ezik, azken horrek 20 km/h-ko muga baitu, oinezkoentzako plataforma bakarreko kalea delako.
Jarduera hiri atseginagoa lortzeko beste neurri bat da, jasangarritasun integratuan oinarritutako hiri-eredu baterantz aurrera egiteko aukera ematen duena, udal-iturriek azaldu dutenez.
Laster beste radar pedagogiko bat jarriko dute Telletxe kalean, ibilgailu batek kolpatu ondoren kendu behar izan baitute konpontzeko.
Seinaleztapen horizontala
Bestalde, Eskola-bide seguruak proiektuaren barruan, zenbait ikastetxeren inguruko galtzadetan seinale horizontalak jartzeko lanak egin dira. Gaueko ordutegian egindako horiek Romo, Nuestra Señora de Europa, San Inazio, Trinitarias, Larrañazubi, Zabala, Andra Mari eta Zubilleta ikastetxeen, eta Gobela, Geroa eta San Nikolas ikastolen inguruetan izan dira. Obra horiek ez dira Madre del Divino Pastor ikastetxearen inguruan egin, inguru horretan galtzadako zoladura berritzea aurreikusita baitago.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.