Beste behin, Ongi Etorri Errefuxiatuak plataformak manifestazioa egin zuen atzo, domekan, Ereaga hondartzan, migratzaileentzako legezko bide seguruak eta harrera-lurraldeetan dituzten eskubideak errespetatu daitezen exijitzeko. "Europara iritsi nahi dutenen hilobi bihurtu den itsasoari begira", salatu dute gerrak, esplotazioa, gosetea eta muturreko pobrezia eragiten dituzten politikak direla migrazioen arrazoi nagusiak, eta egungo migrazio-eredua bizitzaren aurkakotzat jo dute.
Inor ez da ilegala!
— EH Bildu Getxo (@GetxokoEHBildu) September 15, 2024
Urtero bezala, gaur Ongi Etorri Errefuxiatuak taldeak antolatu duen ekimenean parte hartu dugu, Ereaga hondartzan.
Euskal Herria harrera herri izatea aldarrikatzen jarraituko dugu. Eskubide guztiak pertsona guztientzat!#OngiEtorriErrefuxiatuak pic.twitter.com/UaRrGP3igW
Horregaz batera, erakundeen indarkeria arrazista eta migratzaileek jasaten dituzten gehiegikeriak ere kritikatu zituzten, baita eskuin muturrak eta zenbait gobernuk sustatutako diskurtso xenofoboak arbuiatu ere: "Pertsonak estigmatizatzen baitituzte beren jatorriagatik edo larruazalaren koloreagatik, eta elkartasuna zigortzen dute, adibidez, itsas salbamenduko itsasontzien lana eragotziz, Aita Mariren kasu".
Hainbat herritar batu zituen ekitaldian plataformak benetako harrera-politikak ere eskatu zituen, besteak beste, Atzerritarrei buruzko Legea ezabatzea eta Migrazio eta Asilorako Europako Ituna indargabetzea. Udal-erroldarako sarbidea udalerrietan bizi diren pertsona guztiei bermatzeko ere eskatu zuten; izan ere, erroldarik gabe, osasun-arreta, hezkuntza eta oinarrizko gizarte-prestazioak bezalako eskubide asko eskuraezin geratzen dira.
Bukatzeko, Ongi Etorri Errefuxiatuak plataformak tokiko gobernuei, Uribe Kostako Zerbitzu Mankomunitateari, Bizkaiko Foru Aldundiari eta Eusko Jaurlaritzari eskatu zieten neurri zehatzak har ditzatela hiriak bizikidetzaren eta inklusioaren benetako eredu izan daitezen, inor kalean gera ez dadin.