Algortako Zubileta eskolako gurasoek deitoratu dutenez, udaldia aprobetxatu beharrean, ikastetxeko kiroldegia hobetzeko obrak hasi dituzte irailean, ikasturte berria hasi denean. Leku hori da estalitako jolastoki bakarra ikasleentzat, eta, obrek dirauten bitartean, neska-mutilak ikasgeletan egon behar direla salatu dute. Hori dela eta, eskolako guraso-elkarteak patioan karpa bat jartzea eskatu diote Getxoko Udalari, baita Eusko Jaurlaritzari ere.
Egoera honetaz galdetuta, Getxoko Udalak jakinarazi du eskola publiko bateko patioan karpa bat jartzearen inbertsioa Eusko Jaurlaritzari dagokiola. Hala ere, gogoratu du COVID-19aren pandemian zehar, salbuespen gisa, Udalak bere gain hartu zuela ikastetxeetan karpak jartzeko kontratazioa, "baina Eusko Jaurlaritzak emandako % 90eko diru-laguntzarekin".
Obrei dagokienez, Eusko Jaurlaritzak uda hasierarako aurreikusita zuen kiroldegia berritzea, baina irailera arte atzeratu da jarduketa. Hori horrela. Zubileta ikastetxeko guraso-elkartea Jaurlaritzagaz harremanetan jarri da, egoerari irtenbide bat emateko asmoz. Hala ere, oraindino erantzunaren zain daudela jakinarazi dute.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
