Alvaro GonzAlez Kirol zinegotziak azaldu duenez, "zelai horietako belarraren bizi-zikloa amaierara iritsia zen, eta oso instalazio erabiliak direnez, berritzeko kirol-klubekin oso komunikazio zuzena edukitzen lan egin dugu. Era berean, herritarren eskaera batzuei erantzuteko baliatu ditugu obrak, zelaiak erabiltzen dituzten kirolari askoren eskura jartzen ditugun zerbitzuen hobekuntza orokorra ekarriko dutenak".
Soropila aldatzeaz gain, zenbait zelaitan soropilaren azpian jartzen den lurra ere berritu behar izan dute. Hori dela-eta, lanak amaitzeko epea aurreikusitakoa baino bi aste gehiago luzatu da. Zelaiak hobetzeagaz batera, ureztatze-kanoiak eta errugbiko makilak instalatu dituzte, baita Fadurako erabilera anitzeko zelaian beisbolera jokatzeko egokitzapena egin ere. Halaber, ureztatze-kanoi berriak instalatu dira Bolue 1 eta 2 zelaietan eta Bolue 3 zelaian zeudenak berritu egin dira.
Aldi horretan, aprobetxatu dute Bolueko zelaietako aldagelak handitzeko lanei ekiteko. Bolue 1 eta 2 zelaien berrikuntzak barne hartzen ditu 4 aldagela berritzea eta botikinerako eta bainugeletarako gune bat jartzea; eta Bolue 3n dauden aldagelak handitzen ari dira. Berrikuntza hori urtea amaitu baino lehen amaitzea espero dute.
Getxo Kirolak-ek egindako inbertsioaz gain, Getxoko Udalak beste 550.000 euro eman ditu, Gobernu Irekia eta Modernizazioa Arloak sustatzen dituen aurrekontu parte-hartzaileen testuinguruan, Bolue 1 eta 2ko aldagelak eraberritzeko eta Bolue 1 zelaiko belar artifiziala berritzeko.