Datorren azaroaren 24an egingo dituzte Bizilagunak-Aldameneko familia ekimeneko bazkariak Getxon, "Hamaika zapore, mila istorio" lelopean. Egitasmoa Getxoko Udalak, Egizu Getxo Euskaldun elkarteak eta Getxoko Etorkinen Plataforma Federazioak sustatzen dute, eta helburua da kultura eta jatorri ezberdinetako familiak batzea, bertoko eta beste herrialdeko bana, otordu bat partekatzeko, etxean edota txokoren batean.
Zapore, ezagutza, interes eta esperientzia komunak partekatzearen bitartez, elkarbizitza hobetzea eta aniztasuna eta kultur artekotasuna ospatzea da Bizilagunak-Aldameneko familia ekimenaren helburua.
Bazkari bakoitzean pertsona dinamizatzaile bat egongo da familiakaz edo elkarbizitzako taldeakaz. Jardueretan parte hartu gura duten familiek edo dinamizatzaileek daborduko izena eman dezakete hemen.
“Ekimenaren bidez, gure udalerriko kultura-aniztasuna balioetsi nahi dugu, eta gizarte ireki eta anitza sustatzen jarraitu. Bizilagunak elkarteak batasunaren balioa indartzen du aniztasunean, elikagaiak, tradizioak eta esperientziak partekatzea harremanak estutzeko, gure auzokideen artean loturak sortzeko eta kulturartekotasuna ospatzeko bide bat dela ulertuta", azaldu du Mihaela Jilavu Diaconescu, Kultur artekotasun eta Immigrazioko Unitateko zinegotziak.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
