Abenduaren 3an Euskararen Nazioarteko Eguna ospatuko dela-eta, udalerriko elkarteek antolatutako ekintza guztietan parte hartzeko deia egin die herritarrei Getxoko Udalak, "Bat egin Getxoko Euskararen Egunarekin" lelopean. Horretarako, egutegia prestatu du, eta kartel batean ageri den QR kode baten bidez ere ezagut daiteke.
"Udalak argi eta garbi adierazi nahi du hizkuntzaren aldeko adostasun sozialean sakontzeko konpromisoa eta prestasun irmoa duela, eguneroko bizitzako jarduera guztietan hizkuntzaren erabileraren alde lan egiten jarraitzeko asmoarekin batera, hala nola, familian, lanean, aisialdian, heziketan, merkataritzarekin eta ostalaritzarekin harremanetan, eta edozein jarduera publikotan eta pribatuan", adierazi du Amaia Agirre alkateak.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!