Antolatzaileek zehaztu dutenez, 140 norbanako, 20 bat familia eta 20 elkartek parte hartu dute egitasmoan, iazkoaren pare, aste-akabua "zaila" izan arren. Hala ere, nabarmendu dute parte-hartzea orekatuagoa izan zela orduz ordu, eta parte hartu zutenek "oso ondo" pasatu zutela ekimenean. Izan ere, hori lortzeko, igerian txandaka aritzeaz gainera, orduak dinamizatzeko hamaika jarduera antolatu zituen Swim Camp Getxo elkarteak, hala nola jokoak eta waterpolo entrenamenduak.
Aurrekoan legez, euskaraz bizi gura dutela aldarrikatzeko hurbildu ziren igerilariak, eta hori ahalbidetzeko elkarte bati eman diote aurten batutako diru guztia, Bizarra Lepoani, hain zuzen. Helburu horretarako, gainera, uretan txonbo egin ez zuten beste euskaltzale asko ere bertaratu zen Fadurara, hala nola giroa dinamizatzeko Oier Garamendi eta Haizea Larrosa musikariak eta Haizea Belasko eta Haritz Sanchez, baita Udalbatzako zenbait ordezkari ere, tartean, Amaia Agirre alkatea.
Antolatzaileek eskerrik beroena helarazi diete parte-hartzaile guztiei, eta aurtengo edizioak izandako babesari erantzunez, datorren urtean egitasmoa errepikatuko dutela iragarri dute.
