23 urteko gizonezko bat arma zuriz zauritu zuten zapatu goizaldean Areetan. Udal-iturriek zehaztu dutenez, hainbat gazteren arteko borroka batean, mutila labanaz sastatu zuten. Udaltzainek lau gazte identifikatu zituzten auzo horretako metro-geltokitik gertu, eta arma trenbidera bota zutela egiaztatu ahal izan zuten. Zauritutako gaztea lekuan bertan artatu zuten osasun-langileek, eta larri eraman zuten Gurutzetako ospitalera.
Udaltzainek arma berreskuratzea lortu zuten, eta identifikatutako lau gazteak atxilotu zituzten. Ikerketa Ertzaintzaren esku dago orain.
Atxilotuetako hiru adingabeak dira, eta polizia-iturriek jakinarazi dutenez, horiek aske utzi dituzte Bizkaiko Probintzia Auzitegiko Adingabeen Fiskaltzatik igaro ostean. Laugarrena, 20 urtekoa, labankadaz eraso egitea akusatuta dago eta Getxoko Guardiako Epaitegiaren esku utzi dute.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
