Kluba "bahituta" dutela salatu duten kirolariei erantzunez, Getxoko Arraun Elkarteak publikoki erantzun du esanez edozein bazkideren onarpen-prozesua ez dela automatikoa, eta zuzendaritza-organoaren aldeko iritzia behar duela. Izan ere, elkartekoen arabera, onarpenak ekainaren 22ko 163/2010 Dekretuak eta klubaren estatutu sozialek arautzen dute, eta horrek esan gura duela edozein eskaera formal zuzendaritza-batzordeak "diskrezionalki" baloratzeko ahalmena duela, kasu bakoitzaren inguruabarrak kontuan hartuta. Ondorioz, elkarteak adierazi du onarpen-prozesua ez dela automatikoa, eta zuzendaritza-organoaren aldeko iritzia behar duela.
Hala ere, klubak azpimarratu du eskaera bat ez onartzeak ez duela eragozten interesa duten pertsonek klubaren jardueretan parte hartzea edo laguntzea. Eta puntu horretan aipatu du klubaren jarduerak eta helburu sozialak garatzen laguntzeko interes erreala eta eraginkorra dagoela egiaztatzen denean, zuzendaritza-batzordeak onarpen-eskaerak berriz aztertu ahal izango lituzkeela.
Klubaren estatutuen seigarren artikuluak dio hiru baldintza betetzen dituzten pertsonak izan daitezkeela bazkide, hau da, adinez nagusiak direnak, dagokion sarrera-kuota ordaintzen dutenak eta kirol-elkartearen helburuetan interesa dutenak. Zazpigarrenak, aldiz, zehazten du bazkide izateko eskaera presidenteari jakinarazi behar zaiola, eta horrek jakinaraziko diola zuzendaritza-organoari bertako kideek zehazteko aurreko artikuluak (seigarrenak) zehazten diren baldintzak betetzen diren ala ez zehazteko. Bete ezean, eskaerari uko egiteko ahalmena izango luketela.
Kasu honetan, bazkide izan gura duten kirolariek deitoratu dute den-denek eman beharreko pausoak eman dituztela, eta baldintza guztiak betetzen dituztela. Hori horrela, ez dute ulertzen zer dela eta ukatu zaien eskubide hori. Kontuak horrela, bide judizialera joko dutela iragarri dute berriro ere.
