Tximinoaren bideo faltsuaren prozesua honelakoa izan da: lehenik eta behin, mugikorragaz bideoak grabatu ditugu, benetakoen antzeko estetika izan dezaten. Gero, hondo berdea duten makakoen (tximinoen) irudiak bilatu ditugu. Hondo berdea erabiltzeak erraztu egiten du irudiak isolatzea eta mugikorragaz grabatutako bideoan integratzea.
Hurrengo urratsean, bideo biak elkartu ditugu. Horretarako, adimen artifizialaren laguntza duten edizio-programak erabili ditugu; adibidez, After Effects softwarea, jatorrizko bideoaren kamera-mugimendua jarraitzeko. Honela, tximinoen bideoa kameraren mugimenduagaz bat egitea lortu dugu. Ondoren, hondo berdea ezabatzeko iragazki bat aplikatu dugu, eta horrek tximinoen irudiak bideo nagusian txertatzea ahalbidetu du, modu errealistan.
Amaierako emaitza ez dugu perfektua izatea bilatu. Gure helburua ikusleei erakustea izan da zein erraza den bideo faltsuak sortzea, eta horrek garrantzia du jendeak bideoen egiazkotasunaz zalantzan jartzen ikas dezan. Eta zuk, sinetsi egin zenuen?
