Joan den barikuko haize-ufada bortitzek Bizkaia Zubia eusten dioten 18 kableetako bat kaltetu dute. Hori horrela, segurtasunagatik, atzo, zapatuan, azpiegiturako arduradunek erabaki dute galaraztea autoen joan-etorriak zubiaren ontzian, beste abisu bat eman arte. Hala ere, oinezkoak, motoak eta bizikletak igaro ahal izango dira.
Marta Uriarte Bizkaia Zubiko zuzendariak Radio Bilbaon azaldu duenez, ontziak "normaltasun osoz" jarrai dezake lanean, autoen pisuari eutsiko liokeelako. Hala ere, badaezpada, motoak, bizikletak edo oinezkoak bakarrik erabiltzea erabaki dute. Izan ere, azaldu duenez, autoek eta furgonetek kargaren % 70 hartzen dute.
Zerbitzuaren normaltasuna "egun gutxi barru" lehengoratuko dutela iragarri dute arduradunek.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
