Udan, uztailean eta abuztuan, 2015ean jaiotako saharar haurrei Aljeriako Tindufeko errefuxiatuen kanpamenduetako errealitate gordina ahaztu ahal izateko aukera eskaintzen die programak. Helburuak dira adingabe horien oinarrizko beharrizanak asetzea aipatutako hilabeteetan; azterketa mediko orokorra, begietakoa eta hortzetakoa ahalbidetzea; beren bizilekuko klima gogorra pairatzea ekiditea, tenperaturak 55 ºCra iritsi ahal direlako; trukaketa kulturala, eta getxoztarren artean Saharako herriak bizi duen egoeraz sentsibilitatea sortzea.
Ekimen honek hainbat ezaugarri ditu, eta, antolatzaileek nabarmendu dutenez, umeak familietan integratzen dira erraz, apurka-apurka haien bizimoduetara ohituta. Gainera, udan zehar zenbait jarduera egiten dituzte, hala nola txangoak, zaldi gainean ibilaldiak, Sahararen Eguna Algortako jaietan eta herri-bazkariren bat. Jarduera horietan Saharako umeek eta beraiek hartzen dituzten familiek parte hartu ahal izaten dute. Aldian behingo topaketak egiten dituzte ere, familiak modu boluntarioan joan daitezen eta elkarteagaz eta gainerako familiakaz iritziak trukatzeko.
Halako ekintzetan, begirale bat dago uneoro, eta, gainera, edozer gauza gertatuz gero familiek berarengana jo dezakete beti. Bestalde, saharar umeei eta harrera-familiei Getxo Kirolakeko txartela ematen zaie harrera hilabeteetan, instalazioak erabili ahal izateko, baldin eta familiak Getxo Kirolakeko bazkide ez badira.
Udalak, besteak beste, honako gastu hauetarako ematen du diru-laguntza: kanpamentuetatik etortzeko eta joateko bidaiarako, txangoetarako eta ekitaldietarako.
Pertsona interesatuek daborduko egin dezakete izen-ematea eta, informazio gehiago behar izanez gero, hurrengoetara jo dezakete: 658 751 359 / atfalgetxo@gmail.com edo Getxoko Udaleko Lankidetza sailean, 94 466 00 17 / lankidetza@getxo.eus.