Eskola-taldeek goizez eta eskola-ordutegian jardungo dute, haurrei tradizioa gerturatzeko asmoz. Arrastian, 18:00etatik 21:00etara, helduen taldeek eta talde mistoek –helduek eta haurrek osatutakoek– hartuko dute lekukoa. Ohiko moduan, gune bitan antolatuko dira emanaldiak: bata Itzubaltzeta/Romo eta Areeta auzoetan, eta bestea Algorta eta Andra Marin. Horrela, Getxo osoan zehar izango da kantuen doinuak entzuteko aukera.
Jaialdiaren amaieran, parte-hartzaile guztiak elkartuko dira gune nagusietan azken emanaldia eskaintzeko. Romo-Areetako taldeak Areetako Xake plazan bilduko dira 20:00etan, eta Andra Mari-Algortako taldeak, aldiz, Algortako Telletxe plazan, ordu berean.