Gizartea aktibatzeko estrategia horren barruan, manifestazioa deitu dute domeka honetarako, otsailaren 16rako, 13:30ean, Bizkaia Zubitik abiatuta, euren aldarrikapenak agerian uzteko eta Palestinako herriaren aurkako indarkeria eta genozidioa salatzeko.
Gernika-Palestinatik ohartarazi dutenez, deportazio masiboen azken mehatxuak, Gazako herritarren mugimenduen murrizketak, laguntza humanitarioaren eskasia eta Zisjordaniako erasoak direla eta, gertakari horiek nazioarteko bitartekaritzagaz lortutako su-eten ahula arriskuan jartzen dute.
"Ezinbestekoa da elkarrizketa eta negoziazio bideak mantentzea, Palestinako herriak askatasunean existitzeko duen eskubidea bermatzeko", azpimarratu dute.
Hala, herritarrei dei egiten diete domekako mobilizazioagaz eta etorkizuneko ekintzakaz bat egin dezaten, Palestinari elkartasuna adierazteko, genozidioa salatzeko eta su-etena bete dadila eskatzeko.