Joan den zapatuan, hilaren 15ean, ireki zuten Euskaraldiaren laugarren edizioan izena emateko epea, bai entitate gisa bai herritar moduan. Hala, besteak beste, Getxoko Udalak eta tokiko erakunde autonomoek izena eman dute daborduko. Irantzu Uriarte Euskara zinegotziak nabarmendu duenez, "horrela, euskararen erabileraren aldeko urratsak ematen segitzen dugu, eta bai langileak eta ordezkari politikoak zein gure jarduera profesionalean harremana dugun pertsonak gonbidatzen ditugu euskara gehiago erabiltzera”.
Jarduera horregaz aipatutako erakundeek hartu dituzten konpromisoen artean daude Belarriprest eta Ahobizi rolen berri ematea eta kideak rol horiek hartzera gonbidatzea; euskararen erabilera sustatzeko baliabideak eskura jartzea, hizkuntza-ariketan parte hartzen ari dela ikusgarri egitea, euskaraz lasai aritzeko guneak (Ariguneak) sortzea, eta komunikazioak euskaraz egitea, hizkuntzaren presentzia indartzeko ahal dituzten neurriak hartzeagaz batera.