Gure Esku mugimenduak mobilizazio nazionala deitu du datorren ekainaren 7rako. Izan ere, mugimenduaren arabera, une egokia da berriz ere herritarren borondatea mahai gainean jartzeko eta Euskal Herriak bere etorkizuna erabakitzeko duen eskubidea berresteko. Mobilizazioa Bilbon egingo dute, baina, nabarmendu dutenez, herri eta eskualdeek protagonismo berezia izango dute.
Gaur egungo testuinguruan, gudak, genozidioak, esplotazioak, arrazakeria, indarkeria matxista eta beste hainbat injustizia gertatzen ari dira munduan zehar. Testuinguru horretan, aitortu dute batzuek pentsa dezaketela erabakitzeko eskubidearen aldarrikapena huskeria bat dela. Hala ere, Gure Eskuren ustez, munduko arazoak konpontzeko boterea gutxi batzuen esku uzteak injustiziak betikotzea dakar.
Era berean, mugimenduak azpimarratu du herri batek libre izan behar duela bere inguruan gertatzen diren injustiziei aurre egiteko eta mundu mailako elkartasunaren parte izateko. Horregatik, Euskal Herriko herritarrei dei egin diete ekainaren 7ko mobilizazioan parte hartzera.