Aisialdian euskararen erabilera sustatzen laguntzea da Getxoko Udalak eta Gure Zirkuak sinatutako hitzarmenaren helburua, Euskara Plan Estrategikoaren barruan umeen eta gazteen erabilera handitzeko neurriakaz bat datorrelako. “Getxon inoiz ikusi ez den euskarazko zirku-ikuskizuna izango da eta espero dugu, gure umeengan eta hain ume ez direnengan ere magia, ilusioa, lilura…sortzea. Euskaldunak, euskara ikasten ari direnak eta euskarara hurbildu nahi dutenek jarduera dibertigarri honetan parte hartzera”, adierazi du Amaia Agirre alkateak, hitzarmenaren sinadura aurkeztean.
Hitzarmenaren arabera, Udalak Gure Zirkuari baliabideak erraztuko dizkio eta Gure Zirkuak hainbat abantaila eskainiko ditu berton, esate baterako, Lehen Hezkuntzako eskola-umeei zirkuaren funtzionamendua eta barrukoak hurbiletik ezagutzeko aukera eskainiko die, eta zirkua Getxon dagoen bitartean Euskaraldiaren egunak izango direnez, hizkuntz ariketan kolaboratzea ere. Iker Galartza Gure Zirkuaren sortzailea oso pozik agertu da zortzigarren denboraldi berriari hasiera emateagatik eta hasiera Getxon hasteagatik:“Jende euskalduna eta hain euskalduna ez dena etortzera animatzen dugu, berritasun beteriko ikuskizuna izango delako, polita, umoretsua, goxoa, koloretsua, parrandaz beterik eta ondo pasatzeko gogoz. Abestu egingo dugu gure hizkuntzan eta gure musikarekin. Ondo pasako duzue gure hizkuntzan eta Gure Zirkuan”.
Saioak
Gure Zirkuak hurrengo bederatzi emanaldi eskainiko ditu Portu Zaharrean kokatuko duen karpapean:
- Maiatzaren 4an, domeka: 17:00etan.
- Maiatzaren 9an, barikua: 19:00etan.
- Maiatzaren 10ean, zapatua: 16:30ean eta 19:00etan.
- Maiatzaren 11n, domeka: 12:00etan eta 17:00etan..
- Maiatzaren 16an, barikua: 19:00etan.
- Maiatzaren 17an, 16:30ean eta 19:00etan.
Bi urtetik gorako sarreren prezioa 15 eurokoa da eta salgai daude Gure Zirkuaren webgunearen bidez.