REC, grabazioetarako botoi ikoniko hori, edukiak etengabe erregistratzeko gogo kolektiboaren metafora bihurtuko du Getxophotok. Jaialdiak irudien gainprodukzioa, teknologia berrien bilakaera, artxiboen eginkizuna eta oroimenaren eraikuntza izango ditu aztergai, ikus-entzunezko hizkuntza garaikidean sakonduz.
Beste behin ere, edizio honetako zuzendaritza artistikoaren ardura Maria Ptqk ikertzaile eta komisario independenteak izango du. Ohikoa denez, nazioarteko proiekzio handiko hamaika artistek parte hartuko dute ekimenean, eta euren lanak Getxoko kaleetan zehar eskainiko dira formatu handiko erakusketa irekietan.
Parte hartzaileen artean nabarmentzekoak dira Yevonde, John Divola, Sabiha Çimen, Arno Gisinger eta Jose Ramon Ais, beste 20 artista ingurugaz batera.
Getxophotok, berriz ere, arte garaikidearen eta gizartearen arteko zubi lana egingo du, argazkigintza eta ikus-entzunezko sorkuntza publiko orokorrera hurbilduz, kalean eta dohainik.
Aurtengo ekimena aurkeztu dute gaur, martitzenean, Algortako Kasinoan, eta bertan izan dira Leixuri Arrizabalaga, María Ptqk, Amaia Agirre, Ana Lopez Asencio eta Jokin Aspuru.