HIRUKAk, Bizkaia Irratiak, Getxoko Komunikazio Zerbitzuak eta Euskaraldia antolatzeko ardura duten eragileek (Udala, Egizu eta Bizarra Lepoan) parte hartuko dute irratsaioan; zuzenean entzun ahal izango da Bizkaia Irratiaren bidez, eta publikoari irekita egongo da, aurrez aurre ikusi eta entzuteko aukera emanez.
Ekimenaren helburu nagusiak dira Euskaraldiari eta, oro har, euskararen erabilerari bultzada ematea; herriko komunikabideei ikusgarritasuna ematea eta kalera ateratzea; Getxoko eragile ezberdinei ahotsa ematea; eta herritarrei euskaraz tarte atsegin bat eskaini eta parte hartzeko aukera ematea.
Irratsaioa formatu parte-hartzaile eta dinamikoan egingo da, kalean bertan kokatuko den irrati-estudio baten bidez. Mahaian, komunikabide eta eragile bakoitzeko ordezkari bana arituko da, rol ezberdinak hartuta eta txandaka. Megafonia bidez, inguruko herritarrek saioa entzun ahal izango dute zuzenean.
Halaber, gonbidatu bereziak ere izango dira saioan, hala nola Iñaki Etxegia eta Celeste Agüero musikariak, Tor Magoa, Gure Zirkuko ordezkariak eta Berantzagi taldeko kideak. Hala, musika, magia, elkarrizketak, ikuskizunak eta jolasak uztartuko dituen irratsaioak ikus-entzuleentzako esperientzia atsegin eta dibertigarria eskainiko du, askotariko sorpresakaz batera, betiere euskararen aldeko giroan.