Algortako Villamonte eta San Nikolas liburutegietan, eta Romoko Romo Kultur Etxean daude eskuragarri erreminta hauek. Gailua txikia da, poltsikoko tamainakoa, eta testuen irudiak hartu eta automatikoki ahots bihurtzen ditu, hainbat hizkuntzatan, euskara barne, ikusmen urritasuna duten pertsonek informazioa entzuteko aukera izan dezaten.
"Ohore bat da Getxoko liburutegiek gure lupak txertatzea milaka pertsonen beharrei erantzuteko. Proiektu hau hemen sortu eta gure komunitatean eragin positiboa izatea motibazio iturri da guretzat", azaldu du Eneko Calvok, LUP enpresako sortzaileetako batek.
Ekimen honek, irakurketara sarbidea errazten die ikusmen-zailtasunak dituzten pertsonei, eta inklusioaren aldeko urrats garrantzitsua da. "Inklusiorako dugun konpromisoa berresten dugu. Liburutegiek eboluzionatu behar dute, eta teknologia honen txertaketa progresiboa egokitzapen horren parte da. Proiektuak arrakasta badu, gailu gehiago jarriko ditugu herritarren esku", adierazi du Susana Barreiro Ugartek, Getxoko liburutegietako arduradunak.