"Berbodromoa Irune Etxebarria Atxaren omenez" izango da aurten euskararen erabilera indartzea eta indar erakustaldia egitea helburu duen ekimenaren XIV. edizioaren izena, urtetan bidelaguna izan den eta pasa den martxoan hil zen euskaltzale getxoztarra gogoratzeko.
Ohi bezala, euskara ikasten ari direnak, euskaraz hitz egiteko aukera gutxi dutenak eta euskaldunak elkartuko dira taldeka, euskaraz eta euskara partekatzeko, jai giroan eta giro atseginean. Talde bakoitzean bost pertsona egongo dira, dinamizatzailea eta lau lagun, eta gai bakoitzari buruz 15 minutuz mintzatuko dira. Gai baten eta bestearen artean, parte hartzaileak mahaiz mugituko dira, mintzakidez aldatuz.
Aurtengo gaiak hurrengoak izango dira:
- Oroitzapenak eta bizitzan egin beharrekoak.
- Estereotipoak, topikoak eta aurreiritziak.
- Euskara eta Euskaraldia.
Egunari amaiera emateko, 19:30etik aurrera, Kantu jira izango da Kresaltxu kanta taldeagaz Romoko kaleetatik zehar.
Parte hartu gura duten pertsonek izena eman beharko dute, labur.eus/berbodromoa2025 helbidean.