Ikuskizun horren bitartez, jaialdiak Benito Lertxundiren ibilbide luze eta emankorra ohoratu gura dute, omenaldi hunkigarri eta artistiko bat eskainiz. "Oriotik Euskal Herrira Benitoren abestiekin" lelopean, emanaldiak ikus-entzuleak bidaia emozional batera eramango ditu, Lertxundiren kantuen bidez Euskal Herriko kultura, historia eta sentimenduen paisaian murgilduz; Oi lur abestitik hasita, Euskal Pizkundearaino!
Ikuskizunaren ekoizpena Baga-biga ekoiztetxeak egingo du eta zuzendari artistikoak Arkaitz Hormaetxe eta Jon Maya izango dira. Lantaldeak hilabeteak daramatza lanean, 2024. urte bukaeran Benito Lertxundiren oniritzia jaso zuenetik.
Zortzi musikarik parte hartuko dute ikuskizunean, bost gizon eta hiru emakume, eta euren interpretazioakaz Benitoren abestiak gaurkotu eta berpiztuko dituzte. Hala, Mikel Markez, Idoia Asurmendi, Janus Lester, Mirua eta beste hainbat artista ezagunek Lertxundiren obra ulertzeko berezko ikuspegiak erakutsiko dizkiote publikoari.
Musika ardatz nagusia bada ere, ikuskizunak diziplina anitzeko izaera du; izan ere, dantza, bertsogintza, marrazkia eta bestelako arte-adierazpenek euren tokia izango dute, ikusleari esperientzia estetiko eta sakona eskaintzeko helburuagaz. Dantzaren alorrean, Kukai Dantza konpainiaren presentzia nabarmentzekoa izango da, euren estilo garaikide eta sustraituagaz ikuskizunari mugimendu poetikoa eta indar eszenikoa emanez.
Hori guztia Euskal Herriko hainbat artistaren parte-hartzeagaz gauzatuko da, elkarlanetik sortutako ekitaldi berezi bat eskaintzeko. Emozioa, artea eta oroimena uztartuko dira gau berezi honetan, Benito Lertxundiren lana eta ondarea belaunaldi berriengana eramateko xedez.