Azaldu dutenez, orain arte, gimnasioaren tarifak 37,40 eurokoak ziren, muskulazio-aretoaz gain, eta jarduera osagarriak barne hartzen zituen: ordu erdiko pilulak, indoor ziklo birtuala eta plaza libreak zituzten beste ikastaro batzuetarako sarbidea. Hala ere, datorren ikasturtean, tarifa 39,30 eurora igoko dute eta soilik muskulazio-aretoaren erabilera barne hartuko du. Gainerako jarduerak egiteko, erabiltzaileek Aukeran programaren 45,60 euroko kuota ordaindu beharko dute.
Aldaketa horrek ikastaroetan ere eragina izango duela ohartarazi dute. Orain arte, adibidez, pilates edo entrenamendu funtzionalaren ikasleek gimnasioan sartzeko eta lau jarduera osagarri egiteko aukera zuten, baina Aukeran sistemagaz horiek galdu egingo dira eta tarifa bi ordaindu beharko dira: ikastaroarena eta Aukeran Plusekoa.
Elkarrekin Podemosek adierazi du programa berria ondo bideratuta dagoela, "interesgarria dela", malgutasuna ematen duelako, baina kritikatu du eskaintza berrantolatzearen izenean prezioak igo izana, herritarrentzat kaltegarri izan daitekeena. Gauzak horrela, talde moreak prezioak aurreko ikasturteko mailara egokitzea eskatu du, eta malgutasunaren izenean ez dezatela murrizketarik edo kostu gehigarririk ezarri.